خلاني.. وجا سيد سيدو

قصص بالدارجة: خلاني وجا سيد سيدو

قالي الصيف الجاي غانجي لداركم كنت فرحانة وليت نحسب فالشهور امتى يوصل الوقت ونتجمعو فدار وحدة اتفقنا شهر 8 نديرو العقد كانت آخر سنة ليا فالجامعة عائلتي على قد الحال وهو كان خدام فواحد المحل د البيتزا على قد الحال ولكن قلت نصبر معاه من الصفر وفرصة نقص انا بين خواتاتي الفقر خلاني نفرك هكا ...تعلقت بيه بزااف ومانكدبش عليكم تعلقت بيه بزاااف هو كلشي بالنسبة لي 3 سنين د الحب والعشرة اتفقنا على كلشي بالتفصيل كان ناقصو يجيب لي القمر لحدا رجليا ولد نقي وولد الجيران كنا ماكتخرجوش هادشي لي خلانا نعيشو شوق بيناتنا شحال من مرة كنضل نشوف فالسرجم وهو كذلك يطل ويبقا واقف بالليل بالسوايع. كنت كنقول مع راسي غا هو لي كاين لي جا سول فيا كنرفض مي عمرني قلتها ليه ههههه كانت سميتو سعيد .. وصل شهر 8 واحد النهار درت فبالي نجبد ليه الموضوع دخلت فيسبوك والو مابانش النهار كله قلت يمكن جاي عندهم شي حد ولا الواليدة ديالو مريضة تأنيث...... النهار التاني والو مابانش ماكانتش الماكلة دوز لي بقيت فبيتي مقابلة الفيسبوك كنعاود نقرأ كاع الرسائل لي كانو بيناتنا. .والو مابانشي ... يا ربي عمرو دارها 3 أيام غابر بلا مايعلمني كيدوزو السوايع بحال سنين ... كنفكر نمشي ندق على دارهم وحيث علاقتنا سرية قلت ضروري نكدب دقيت طلات مرت خوه لباس بيخير فرحات بيا ودخلاتني وحيث انا مشطونة دخلت فالموضوع نيشان قلت لها واش كاين سعيد خسر لي الكومبيوتر وبغيت لي يصاوبوا ليا عفاك إلا ماعيطي لي عليه. ... السيدة بقات كتشوف فيا وقالت لي ...

 

قالت لي مرت خوه راه سعيد ماكاينش. ..جاوبتها بحلا ماهامني باش ماتعيق وفين مشا المسخوط مولفاه يصايب ليا داك المشقوف وتابعيني دروووس. ... قالت لي بلي الواليدة ديالو مريضة وسافر عندها للبلاد فرحت ياربي تسمح لي حيث قلت يمكن وقع ليه شي حاجة درت بحالا بقا فيا الحال والداخل ديالي كنطير بالفرحة. ..رجعت للدار وفتحت فيسبوك خليت ليه رسالة ودعيوة للواليدة ديالو مشيت الكوزينة عركتها حيث قتلني الجوع أيام ماكليتش. ... غسلت جففت صبنت طيبت درت شقا د الدار كله من الفرحة. .. بالليل رجعت فتحت فيسبوك تعجبت حيث ما فاتحش مزال .... اويلي مؤلفة فاش يمشي للبلاد وخا كيكون كنكسيون ناقص كيطل مهم عتابرت بلي الواليدة ديالو يمكن مريضة بزاف .... دازت 10 ايام نهار على نهار كنزيد نتفقس. ... قلت غي يجي نشبع فيه معيور. ...كملات 10 ايام واحد النهار طليت على الفيس لقيتو قرا رسالتي بلا ماجاوبني ..تعجبت

 

طليت من السرجم بأن لي بابهم محلول. ... قلت بلاتي نميك وصل العصر هبط نتسخر للحانوت. .. واااااو تلاقيتو فالحانوت مسخر لدارهم فرحت كان قلبي شوية ويطير من بلاصطو دخلت فالموضوع نيشان هزيت فيه عينيا قلت ليه انا كنموت. .. شاف فيا ماهضرش قلت له يا الله انا كنت كنموت. ..نسيت بلي مول الحانوت واقف قالي كريمة لباس عليك. ... كيف حالك وواليديك قلت له لباس وقلب وجهو ومشا من قدامي تعجبت كثر ما مولفاه يجاوب بدأك البروود درت كصكرووط ديالي وسمعت مساج ففيسبوك مشيت لقيتو هو مصيفط لي يا لهوي غانطيح من الصدمة لقيتو كاتب لي كريمة حتى انا كنت كنموت هاد المدة كاملة. .... هادشي لي كتب لي قلت مع راسي يعني توحشني حبيبي قلت له سعيد ماتبقاش فيك الحال دبا تشافا الواليدة ديالك وانا معاك حبيبي انا كندير معاك وديما معاك كون هاني ....رجع كتب لي كريمة العشية نكملو هضرة

 

صافي درت العشا لمالين الدار ... بقيت العشية نتسناه دخل سلام لباس. . جاوبتو توحشتك قالي كريمة غانقولك حاجة ولكن كالم اوك حاولي تفهمني مزيان ودخلي كلامي دماغك قلت وخا انا كنتسنا قالي كريمة خاصنا نتفارقو راني خطبيت وحدة من البلاد والويكاند جاي لاكط ديالي قبل ماتقوليش ماتقوليش حاجة سمعيني حتى لخر عفاك. .. قال انتي تستاهلي ماحسن مني وانا مشيت للبلاد والواليدة مريضة قالت لي ولدي راني شفت لك بنت خالتك تزوج بيها إلا بغيتي نجي نستاقر معاك ويتجمع شمل ...مانكدبش عليك ابنت ناس مانقدرش نحط كلام مي وهي راضية عليا نتي كتستاهلي ماحسن مني نتمنى تنساني وماتقلقيش من جيهتي كنت عارف غايجي شي نهار ونوصلو لهكا كنت ديما خايف هادي هيا حياتي وعائلتي. .. عمرني بغيت نجرحك ولا بغيت نجبد ليك الموضوع اه انا كنبغيك ولكن مي ماترضاش نجيب بنت عربية وحنا شلوح ... هادشي ماشي ذنبك ولا ذنبي هادشي لي مكتاب وفيها خير راك غاتلقاي ماحسن مني

 

بس هو هضرة وانا جاوبتو قلت له اشوف أداك القطيوط ديالي عمرك براكا مقاليب مابقيتش نتصدم. . ههههه قوي كيف حالك بصح نيت واش الواليدة بقات شوية ههههه هي نجيب لك كاضو العفيريت غاتجيب لي الضرة شلحة وخا عليك ...قالي كريمة عفاك هكا كتعذبيني فيقي شوية عفاك انا كنهضر بالصح معاك وهضرتي دبا معاك هنا خاصها تسالي حيث بحلا كنخون البنت لي خطبت سمحي لي وتهلاي فراسك عمرني قربت لك ولا وحتى حطيت عليك أديا حيث عرفتك نتي ماشي ليا .... بعدها عملي بلوك بدأ الشك يدخل ليا مانعست ليل كلو .... الغد ليه جات مرت خوه دخلات عندنا مع الدخلة قلت لها اوا كاين شي تحضيرات العرس قالت لي رآه ماغاديش يدير العرس غا لاكط ويجيبها قالت ليه مو داكشي باش دير العرس كمل بيه دارك هنا تحطمت نيشان دخلت لبيتي الدموع والو مابغاو يطيحو لي ..حسيت بشي حاجة قسمات راسي مافهمت والو يديا بحال البونج ياربي يارب تشوف من حالي ياربي ..... دخلت الدوش بحوايجي وطلقت عليا الما البارد حسيت بالنهاية. ..هنا بدات قصتي ومعاناتي

 

تفارقت معاه اش كيعني هدشي فين انا فين سعيد يعني مابقيتش نفرح. .. عشت حالة مابين الهبال والعقل طفاا كلشي فعيني دخلت فازمة حقيقية ايااام وانا فالفراش مرة فعقلي مرة غ كنخربق مي مزال مابكيت وباقي كنحلم بيه. ... ياربي.علاش مانموت. .. أيام ستامرات الأزمة ....ضعافيت مالين الدار كرهتهوم علاش مانكون شلحة عمرني حليت فيسبوك من نهار الفراق ولا حليت تلفون كلشي كيفكرني بيه حتى عينيا فالمراية كلشي كلشي ..... ياربي..... كنبقا بلا دوش ايام

 

دق باب دارنا دخلات بنت خالتي دخلاتها ماما عندي من بعد عرفت بلي ماما لي عيطات ليها تشوفي مالني بدات تهضر معايا حاجة وحدة قدرت نقولها ولي خلاتني نبكي من على فراقنا ثريا خلاني مشا تزوج هنا بديت نبكي وهي تسكتني بكا هستيري تقولو الواليدة لي ماتت لي .... بنت خالتي بدأت تسكتني قالت. لي ديري فيا الثقة ...حللت البيسي مسحات تصاورو وهي تسب فيه ماكاين غا الله يلعن تاسيلطك وسبان تحت السمطة حلات تلفوني مسحات كلشي عاودات فورماطاتو مشات داكرة الهاتف وكاع الذكريات

 

بقات معايا بنت خالتي 15 يوم حالات معايا بمعنى الكلمة مشينا الحمام خرجنا مرة ولا جوج كنحاول مع راسي ولكن كلشي كيفكرني بيه الحانوت الدرب الدراري الحيوط السراجم شوية شوية بديت نأكل مانسيتوش ومانقدرش نساه كل دقيقة كنتفكرو كنكره راسي .... ولكن على الأقل وليت نهضر مع مالين الدار ونضحك مرة مرة مع المصيبة المصيب د بنت خالتي ...نهار لخر لبنت خالتي عندنا قالت لي هاد المرة خدمي دماغك ماشي قلبك ونصيحة لله نوضي كوني راسك خدمي يتمناك سيد سيدو وماعمرك ديري راجل فقلبك. ... مشات بنت خالتي رجعت كيف اليتيمة. .. عاطياها غا للبكا. .. وكنتخبا إلا غانتسخر كنتخبع وكنخرج الوقت لي كيخوي هو الدرب باش مانشوفو إلا شفتو غانموت ولا غانطيح عليه نعنقو

 

صافي مهم انا عايشة جسد بلا روح واحد النهار خرجت بوحدي ضربتها بالرجل حتى لحدا البحر بوحدي وليكيت فودني نسمع موسيقى ....ماعليا مابيا حتى شفتو مع مرتو. ..جايين ماعرفت كيفاش حبست راسي. .. بغيت نعنقو بغيت نسرفقو بغيت نغوت ...... بقيت نشوف فالجيهة الأخرى حاجة وحدة برداتني هو أن مرتو خايبة. ... عمرني حسيت راسي زوينة حتى لداك النهار ولا غا حيث مقهورة مهم ماعارفاش تلبس والمشية ديالها فشكل مانكدبش عليكم قد ما بقا فيا الحال قد مارتاحيت شوية داك النهار حسيت بحالا نجاتي الله منو وليت كنقول خاصني بداية جديدة خاص كريمة قوية ناجحة

 

كانت عندي واحد الأغنية ديال سميرة سعيد ديك دالي ( هوا هوا ) فالتلفون غا داز و وانا نشعلها. ..صراحة انا انيقة على مرتو مشية ديالها فشي شكل وحجبانها مقطعاهوم ولاو خيط رقيق مهم شلاضة محطوطة ههههههه حسيت بحالا دارت بيه بحلا مابغاني نشوفو. ... قلت مع راسي شتي كريمة ها هو داز ما طحتي ولا بكيتي ولا جريتي تعنقيه. .... ههههه كنتفكر مرتو كنضحك والله ... كنبرد خاطري وخلاص ولكن قلبي شاعلة فيه العافية رجعت للدار. ..بحالا بغيت نتغير وصل الليل بديت نبكي تاني. ..الصباح مشيت للحمام رجعت قررت قرار الحل الوحيد هو نبدل الدرب والمدينة ونكمل قراية ولا نقلب على خدمة حس الرجال كرهت و كرهت الحب وليت معقدة حاقدة على الرجال

 

فكرت دورت تلفون لعمتي لي فطنجة ناري عمتي اميرتي ساكنة هي وراجلها مارزقهوم الله الذرية الصالحة ولكن راجلها مهلي فيها بزاااف. ...وحنين معاها تاصلت بيها باش نمشي عندها وحيث الواليد ماكايبغينش نسافر بوحدي خليت الواليدة تقنعوا وقلت ليهم راه غا سيمانة ونرجع. ... نشأ الله ...خلاوني نمشي كنجمع حوايجي وانا كنبكي حيث درت فبالي مانرجعش. ... باشما كان كرهت هاد المدينة وذكراياتها

 

واو انا فالكار ليكيت فودني عايشة عالم ديالي بوحدي وأخيرا. ..... انا مارجعاش وغانسا بوزبال ومانرجع حتى نكون قوية. ..وقادة على المواجهة. .. سافرت طنجة وصلت بيخير فرحات عمتي لقيتها وجدات لي بيت ديالي بوحدي قلت لها شوفي عمتي انا جايا نسكن عندك وخا. ..قالت لي بنتي دار دارك وراجلها قالي عيد كبير هذا مرحبا بيك بنتي. ... دازت سيمانة لولة بحال الحلم ماكاين غا خاطري ... مشاو معايا تا شريت شي بياسات واعرين وكل لبسة بصباطها. .. وصاكها مهم داكشي مفخفخ افينك اسعيد هههههه الله يعميها ليك لاصق فقندوحة مافيها مايتشاف. . ..مهم دازت سيمانة نعاس دوران والشوبينغ مع عمتي ...واحد نهار جات عندي عمتي قالت لي بنتي بغيت نهضر معاك

مهم دازت سيمانة وا ماكلة فشي شكل وحياة أخرى. ..حتى جات عمتي دخلات عليا بغات تهضر معايا قات لي بنتي ... مرحبا بيك عندي ماترفدي الهم لوالو ... ولكن انا بحال الواليدة ديالك بغيت مصلاحتك علاش ماترجعي تقراي تكملي ديري ماستر ديالك ولا قلبي على شي خديمة والا بغيتي نوصي حسن ( راجلها) يقلب لك ... مهم ديري علاياش ترجعي راه زمان آخر هدا ماتعرفي تزوجي يلقاك راجلك بخدمتك يدير ليك قيمة. ...قاطعت كلامها قلت لها انا ماغنتزوج عمتي ولكن كلامك صحيح خاصني نقلب وانا من غدا نخرج نشأ الله نقلب وانا جايا اصلا ندير حياتي قالت لي اوا بنتي ماتقلقيش انا بغيت مصلاحتك وانا معاك حتى تخدمي ولا تكملي لي قرايتك. ..ولي حتاجيتيها هانا معاك

بقيت نقلب على خدمة والو ماجبرت والو. .... ناري طنجة عالم آخر نقاوا وناس كي عايششين صراحة دراري هنا زوينين بزاااف ولكن لا لي بغات تزوج اما انا والله لا قبلت بشي بوزبال. ..... مالقيتش خدمة خداني راجل عمتي صطاج عندو فالشركة. ... عند واحد السكريتيرة مسمومة ولكن صراحة انا ماتقربش لي حيت فاميليا الباطرون ديالها. ..يعني احنينتي حتارميني ولا نخلي راجل عمتي يجري عليك ههههههه قلبت شريرة والله ماكنت هكا ولكن سعيد خرج فيا العجب ..... واليديا طلع ليهم الزعاف قلت ليهم راني غاتبقا هنا خاصة الواليد حيث راجل عمتي عندو فلوس ولباس عليه ديما الواليد حاقد عليه وخا مسكين ظريف وكونا عليه فكرة خايبة

 

مهم بديت صطاج داك القلب الهشيش مابقاش. ... الشركة عامرة تيتيز دراري من صحاب الكومبلي واللغة الفرنسية كلشي كايحاولو يهضر و معايا. ..ووالو ديما كنبين راسي غامضة كلهم عارفيني فاميلت الباطرون ولكن ماعارفين عليا والو كايخرجو ماكنخرجش معاهم. ... مهم حاقدة على البشر فالداخل ديالي راجل عمتي يظل يشكر فيا حيث داخلة سوق راسي. ..فلول كنت فالتعليب من بعد درت شهر صطاج آخر فالحاسابت. ...من بعد واحد نهار تصدمت فاش قالي غاطلعي للإدارة العامة فالطبقة الثالثة. ...وأه ياناري صدمة

مهم ماعرفتش اش سميتو حيت هو ديريكتور جديد ولد الحرام وباقي صغير فالعمر. .... مهم منو لراجل عمتي هو دراعو اليمين. ... كيعتامد عليه فكلشي. .... بقات هكاك حتى لواحد النهار عيط لينا للاجتماع كاملين من بعد ماتسلمت مكتب الإحصاءات فالادارة الفوق. ... علن عمي على افتتاح فرع جديد للشركة فطنجة نيت .. وقال بلي غايصيفط أصحاب الكفائة يخدمووو فيه فرحت هادي فرصة أخرى. ..وكاع موظفي الإدارة متشوقين يعرفو شكون غايمشي .. عيط راجل عمتي على السكريتيرة المسمومة وعلى فريد ...فريد هدا عالم حتى هو ولد مراكش. .وعيط على المعفر ههههه ياس المعفر غادي معانا خلاص راجل عمتي قالي غا تكوني فالدار مزال ..... صراحة حاقدة على الرجال ولكن داك المعفر بغيتو معانا باين فيه غايخدم حيث قراي مسخوط على فكرة سميتو محسن

 

ناري عيط عليا عمي كلهم كايشوفو فيا وا كي دارت ليها .... مهم المعفر بقا كايشوف فالساعة ديالو ...زعما راني جدي. ... وكيشوف فواحد الضوسي فيما بغا يشوف يشوف وانا مالي مهم ضمنت راسي غاديا معاهم.... بداو كيفرقو المهام المعفر هو الديريكتور ديال الشركة جديدة انا وليت مديرة التسويق. ... المسمومة هي السكريتيرة نتاع المعفر ... حتى انا هداك جهدي ناس لي قراو فكندا اصلا توقعتهم يشدو الإدارة. ..... مهم مشينا اول نهار خدمة داز ثقيل حيث شي كيشرق شي كيغرب. ..مهم انا كنضحك مع راسي ولكن ديما كنبين راسي شخصية عملية جدية وغامضة

                











......

Posted by : القلب الحزين Tags : الكل , حب , خيانة

Subscribe by Email

Follow Updates Articles from This Blog via Email